陈方安生政改梦露底:望有机会与中央有沟通

2013-04-29 10:23:38  来源:大公网

  大公网4月29日讯 《太阳报》今日发表评论已文章,文章指出:前政务司司长陈方安生近日借政改前期讨论“过桥”,一时又话以关注商界声音为卖点,讲到自己好似为咗民主大业抛个身出嚟,查实民主阿婆呢个“旧电池”每次出动都别有所图,终于露底,佢寻日终于讲到出口希望有机会同中央沟通,讲到尾其实想为自己装番个消失咗嘅政治光环。

  成立组织搞搞震 广受批评

  民主阿婆上周中成立“香港2020”政改平台,整色整水包装佢哋系关注商界声音,前港区人大代表吴康民率先撰文批民主阿婆系港英余孽第一梯队,只可惜“气数已尽”。之后佢又畀自由党荣誉主席田北俊以商界身份反批民主阿婆捉唔到商界关注点,叫佢唔好扮商界代表。民主阿婆早几日出席论坛时更畀台下人士挑机,翻旧帐话佢讲到民主咁好,点解做政府官员时唔推动民主喎。

  民主阿婆连日上窜下跳无所不用其极,原本以为佢又想过吓镁光灯瘾,不过民主阿婆寻日喺电视台访问时终于露底,原来佢系想有机会同中央沟通。当主持人问到如果有朝一日好似之前政改方案,邀请佢入中联办去倾系咪接受时,民主阿婆起初顾左右而言他,之后被再三追问系咪唔使理中联办时,佢终于明确讲到明同中联办沟通系正常嘅事,不过谈判对象一定系特区政府。

  刘乃强:冇咗电嘅旧电池

  民主阿婆连日讲东讲西终露出狐狸尾巴,亲中阵营乘机润佢畀说话佢听,其中以基本法委员会委员刘乃强最为理直气壮,直指唔需要高估民主阿婆呢个平台,事关佢唔只系旧电池,直情系无咗电,又话民主阿婆声称代表商界发声系无意思,其实至今都无商界承认系代表佢哋嘅意见,不过刘乃强最为“夭心夭肺”嘅一句,就系直斥民主阿婆呢个人系过去式,所以认同吴康民形容呢个人“气数已尽”嘅说法。

  不甘寂寞嘅民主阿婆畀人睇穿晒佢嘅底牌,又畀人寸到应一应,睇怕之后想扮乜代表都再无人信,有多余时间剩嘅不如迭埋心水恤多啲发扮靓,总好过出嚟指点江山后畀人冷待咁自讨没趣喇!

关键字: 陈方安生 露底 中央
责任编辑: 孟浩
大公资讯 中国 军事 言论 图片 财经 产经 金融 汽车 娱乐 明星 生活 科技 书画 报纸 香港在线 国际 社会 教育 副刊 食品 会展 宏观 体育 健康 女人 人物 历史 专题